原來今日係我舊歷生日，琴晚去媽媽屋企食飯嗰時媽媽已經俾咗封利是我了，估唔到連Jerry都有份。如果唔係媽媽提起我差啲都唔記起有呢個日子，因為我平時都慶祝新曆生日。
二月同時有我嘅新舊曆生日還有情人節，睇嚟2月真係一個令人心動嘅月份哦。^_^
今日Jerry咁啱放假，佢話等我收工之後同我一齊慶祝生日，真係好開心。
我部電部已經壞咗成大半年了，喺呢段期間我都用住細佬部舊機，今日我終於”的”起心肝買咗部iphone 4 S了，估唔到最後我都唔可以做到出污泥而不染逃唔出iphone嘅魔掌。不過值得安慰嘅係我將部舊電話用盡咗命先再買新機，總算為環保出咗份綿力。
喺無用iphone呢大半年間我感覺到我已與周圍嘅環境脫節，人家談論嘅話題或使用嘅軟件程式我沒份參與其中，雖然當時還沒覺得有買iphone嘅必要但是我一直在想，科技在進步，時代因而在改變，如果我還在原地踏步嘅話會真的慢慢被這個瘋狂發展嘅世界淘汰掉。由此發現做人還是進取點好。本來今日收工後可以同老公Jerry去行吓街辦吓年貨，但是K生話大老闆於晚上請我哋部門食晚飯，唉！其實大家都唔係咁願意出席。之前三年都唔見L老細請我哋食團年飯，只不過L見到隔裡部門新嚟無耐嘅VP好大方請下屬食團年飯，所以身為SVP嘅佢當然唔可以咁小家慳返呢一餐唔請了。不過，人家VP去嘅餐廳都算是高檔次餐廳，而我哋就去返公司餐廳吃飯，如果佢唔想俾人講閒話嘅我哋都覺得好似之前幾年咁唔請仲好
。
因為我哋部門要on shift所以餐飯分兩批人進行，大約每一批用餐一個鐘，K生當然要兩餐都陪同大老闆L用餐了。大家喺吃飯其間嘅話題都好少而且第一次同L老闆吃飯大家都表現得好緊，成餐飯都係L講嘢多我哋只係間唔中付應一下佢嘅說話，到用餐完畢嗰一刻我隱約睇得出大家臉上終於見到曙光嘅表情
。期望下一年唔好再搞同L老闆嘅團年聚餐了
。
今日返工無端端俾老闆“省”咗一餐，喺我嘅角度我覺得件事唔應該由我哋部門負責，但在大老闆嘅角度佢覺得呢件事是重要事應該知道後第一時間通知佢。結果接到大老闆嘅電話我只可以一味聽佢訓話，因為我知道佢認為我做錯咗就係做錯咗即使有千萬個理由，就只能任由佢責罵，因為愈想解釋大老闆就會認為我愈唔服氣‧‧‧
直到隔咗無耐大老闆打第二次電話俾我，呢次電話就由之前嘅責備變為同我分析成件事嘅重要性，但我始終認為因為高層知道嘅內幕比我哋呢種小角色多，第一次遇到呢種問題時我好自然認為與我哋無關，不需再跟進，可惜站在佢老人家嘅角度卻認為是大件事。當遇到這樣嘅障礙物時應第一時間通知佢，由佢來為我哋解決問題。不過呢次大老闆甚具高層嘅作風識得責罵完員工之後又“安慰”返下屬，得我哋感覺到佢嘅威嚴之外又體會到佢對我哋的體貼，佢不愧識得點做一個好老闆。
唔錯都做咗無論我宜家點樣怪責自己都無補於是，唯有吸取呢次教訓了(不過我平時工作都屬於分外小心型，今次發生呢啲咁嘅事情唯有一半怪自己唔識處理一半就當唔好彩了)
